યુક્રેનની સ્ટેટ ઇમર્જન્સી સર્વિસે એક નિવેદનમાં જણાવ્યું હતું કે આ હુમલામાં બે બાળકો સહિત ઓછામાં ઓછા 34 લોકોના મોત થયા હતાં. તેમાં 11 બાળકો સહિત 117 લોકો ઘાયલ પણ થયા હતાં. યુક્રેનના પ્રેસિડન્ટ વોલોડીમીર ઝેલેન્સકીએ જણાવ્યું હતું કે બે મિસાઇલ હુમલામાં ડઝનબંધ લોકોના મોત થયા છે અને બચાવ પ્રયાસો ચાલુ છે. કાયર લોકો જ આવા હુમલા કરીને સામાન્ય લોકોના જીવ લઈ શકે છે.

યુક્રેનિયન પ્રેસિડેન્શિયલ કાર્યાલયના વડા એન્ડ્રી યર્માકે જણાવ્યું હતું કે આ હુમલામાં શક્ય તેટલા લોકોને મારવાના પ્રયાસમાં ક્લસ્ટર મ્યુનિશનનો પણ ઉપયોગ કરવામાં આવ્યો હતો. સુમી પરનો હુમલો એક સપ્તાહમાં જ બીજો મોટો હુમલો છે. અગાઉ ઝેલેન્સ્કીના વતન ક્રીવરિહ પર 4 એપ્રિલે થયેલા ઘાતક મિસાઇલ હુમલામાં 9 બાળકો સહિત 20 લોકોના મોત થયા હતાં